კლუბის ისტორია

კლუბის დაფუძნება

საქართველოს პოინტერ-სეტერ კლუბის ისტორია 2011 წლის 16 თებერვალს იწყება, როდესაც საქართველოს პოინტერ კლუბის დაფუძნება სერგეი შაგინოვმა, ალექსანდრე ნუკრაძემ, გიორგი ანდრონიკაშვილმა, შალვა შავგულიძემ, ლევან ახმეტელმა და გიორგი კუხალეიშვილმა ითავეს.

ახალი კლუბის დაფუძნება განპირობებული იყო კინოლოგიაში ახალი ევროპული მიმდინარეობის აღმოჩენით — ხედვის, რომელიც რადიკალურად განსხვავდებოდა საბჭოთა კინოლოგიური მიდგომებისგან. ამ პროცესში უდიდესი წვლილი საერთაშორისო კატეგორიის ექსპერტს, სერგეი შაგინოვს, მიუძღვის.

იმავე წელს საქართველოს პოინტერ კლუბმა საერთაშორისო აღიარება მოიპოვა და გაწევრიანდა საქართველოს კინოლოგიურ ფედერაციაში, რომელიც, თავის მხრივ, საერთაშორისო კინოლოგიური ორგანიზაციის წევრია.

პირველი საერთაშორისო შეჯიბრი

2014 წელს კლუბმა პირველი საერთაშორისო, CACIT რანგის საველე შეჯიბრი ჩაატარა.

აღნიშნული ღონისძიება ტრადიციად იქცა და მომდევნო წლებში საქართველოში საველე შეჯიბრებების მსაჯობისა და გამოცდილების გაზიარების მიზნით არაერთი წამყვანი საერთაშორისო კატეგორიის მსაჯი და მგეშავი იქნა მოწვეული.

მათი ცოდნისა და გამოცდილების გაზიარება როგორც სპეციალურ სემინარებზე, ისე უშუალოდ საველე შეჯიბრებების მიმდინარეობისას ხდებოდა.

ამავე პერიოდში საქართველოში შემოყვანილ იქნენ ევროპული მოშენების მეძებარი ძაღლები, რომლებიც ადგილობრივი ძაღლებისგან გენეტიკითა და სამუშაო თვისებებით რადიკალურად განსხვავდებოდნენ.

საერთაშორისო აღიარება და კლუბის განვითარება

2018 წელს კლუბი საერთაშორისო პოინტერ კლუბის წევრი გახდა.

იმის გამო, რომ თანდათან იზრდებოდა სხვა ბრიტანული ჯიშების მოყვარულთა დაინტერესებაც, 2020 წელს კლუბმა სახელწოდება შეიცვალა და საქართველოს პოინტერ-სეტერ კლუბი გახდა.

ახალი თაობა და საერთაშორისო წარმატება

აღსანიშნავია, რომ კლუბს მალევე შემოუერთდნენ ახალგაზრდები — დავით სამუშია, გიგა მეგუთნიშვილი და გიორგი არაბული. მათ საქართველოს სახელი საერთაშორისო არენაზე გაიტანეს.

საქართველოში დაბადებული ძაღლი — გიორგი არაბულის „წინანდალის ცა“ — 2024 წელს დიდ ძებნაში ევროპის ჩემპიონი გახდა, რაც უდიდესი წარმატებაა არა მხოლოდ კლუბისთვის, არამედ მთლიანად ქართული სანადირო მეძაღლეობისთვის.

დავით სამუშია საერთაშორისო ექსპერტი და საერთაშორისო პოინტერ კლუბის ვიცე-პრეზიდენტია. მისი დაუღალავი შრომის შედეგია საქართველოს პოინტერ-სეტერ კლუბის საერთაშორისო პოინტერ კლუბში გაწევრიანება და საერთაშორისო არენაზე ღირსეულად წარმოჩენა.

ცალკე აღნიშვნის ღირსია გიგა მეგუთნიშვილის საშენი „წინანდალი“, რომელშიც მომავალი ევროპის ჩემპიონი და მრავალი სხვა მაღალი დონის ძაღლი დაიბადა.

კლუბი დღეს

კლუბი ყოველწლიურად ატარებს საველე შეჯიბრებებს როგორც მწყერზე, ისე ტყის ქათამზე, პერიოდულად კი იმართება გამოფენებიც.

კლუბის ისტორია გრძელდება და გვჯერა, რომ ერთიანობით, საერთო ძალისხმევითა და ქართული სანადირო მეძაღლეობისადმი სიყვარულით მომავალში კიდევ უფრო მეტ წარმატებას მივაღწევთ.