წესები და სამუშაო სტანდარტები

ა. ზოგადი დებულებები

მუხლი 1

საველე შეჯიბრის მიზანია ბრიტანული მეძებრების საველე თვისებების სრულყოფა, თითოეულ ჯიშში საუკეთესო ეგზემპლარების („ტრაილერი“) გამოვლენა და წარდგენა მომშენებლებისთვის, შემდგომი თაობების გასაუმჯობესებლად.

მუხლი 2

შეჯიბრის სახეობა ან სპეციალიზაცია განისაზღვრება საქართველოში მეძებრით ნადირობის ტრადიციებიდან გამომდინარე — ფრინველის კონკრეტული სახეობის (მწყერი, გნოლი, კაკაბი, ხოხობი, ტყის ქათამი, როჭო, ჩიბუხა, ჭოვილო), სავარგულის ტიპის (მინდორი, ტყე, მთა) თუ სეზონის (გაზაფხული, შემოდგომა) მიხედვით. მაგალითად:

• შეჯიბრი მწყერზე.
• შეჯიბრი ტყის ქათამზე.
• მთის შეჯიბრი (როჭო, გნოლი, კაკაბი).
• შეჯიბრი ჭაობის ფრინველზე (ჩიბუხა, ჭოვილო).
• სანადირო შეჯიბრი (ფრინველის მოპოვებით).

შენიშვნა: სანადირო შეჯიბრი ფრინველის მოპოვებითურთ უნდა ჩატარდეს საქართველოს კანონმდებლობით დადგენილი სანადირო სეზონის ვადებში.

მუხლი 3

შეჯიბრი ტარდება ინდივიდუალური ან წყვილთა კონკურსის სახით.

მუხლი 4

FCG ცნობს და აღიარებს შეჯიბრის შედეგებს, თუ მასში მონაწილეობა მიიღო სულ ცოტა ექვსმა (ინდივიდუალური კონკურსი) ან სამმა წყვილმა (წყვილთა კონკურსი) ძაღლმა მაინც.

ბ. მონაწილეობა

მუხლი 5

რეგისტრაცია წარმოებს განაცხადების მიღების ქრონოლოგიური მიმდევრობით. უნდა განისაზღვროს შეჯიბრზე ჩაწერის საბოლოო თარიღი, რის შემდეგაც განაცხადები აღარ მიიღება.

მუხლი 6

ზოგიერთ შემთხვევაში, სავარგულის სიმცირის ან სხვა მიზეზის გამო, შესაძლოა მონაწილეთა რაოდენობა შეზღუდული იყოს და დაუშვან მხოლოდ რაიმე ტიტულის (ადრე მიღებული შეფასების) მქონე ან ერთი სქესის ძაღლები.

მუხლი 7

შეჯიბრზე არ დაიშვებიან ავი ან გადამდები დაავადებით დასნებოვნებული ძაღლები, ასევე დისკვალიფიცირებული პირის კუთვნილი ან FCI-ს მიერ არაღიარებულ კლუბებსა თუ საზოგადოებებში რეგისტრირებული ძაღლები.

მუხლი 8

ამძუნებული ძაღლების მონაწილეობა შესაძლებელია მხოლოდ იმ პირობით, თუ ამის შესახებ ორგანიზატორებს აცნობებენ დილით, შეჯიბრის დაწყებამდე. ამძუნებული ძაღლი მინდორში გამოყავთ ბოლოს, დანარჩენ მონაწილეთა გამოცდის შემდგომ, წყვილთა კონკურსში კი — აწყვილებენ მხოლოდ ძუსთან.

შეჯიბრზე ჩაწერილი ძაღლის ავადმყოფობის ან ამძუნებისას, ვეტერინარული ცნობის წარდგენის შემთხვევაში, შესაძლებელია მისი ჩანაცვლება სხვა ძაღლით.

გ. ორგანიზაცია

მუხლი 9

ჯგუფებს აკომპლექტებენ ორგანიზატორები, ხოლო ძაღლების დაწყვილება და გამოსვლის მიმდევრობის დადგენა ხდება კენჭისყრით. წყვილთა კონკურსში მონაწილეთა კენტი რაოდენობის შემთხვევაში, ცალად დარჩენილ ძაღლს მეწყვილეს უნიშნავენ მსაჯები. იგივენაირად იქცევიან კენჭისყრით ნარგუნი მეწყვილის არგამოცხადების შედეგად, ნებისმიერი მონაწილის ასევე ცალად დარჩენისას.

ინდივიდუალურ კონკურსში 13 ძაღლის, ხოლო წყვილთა კონკურსში 13 წყვილის ჩაწერის შემთხვევაში, ორგანიზატორებს შეუძლიათ მონაწილეები დაყონ ორ ჯგუფად. დაუშვებელია თითო ჯგუფის 15 ძაღლზე ან 15 წყვილზე მეტით დაკომპლექტება, რადგან თუ არა სტიქიური მოვლენით (ამინდის უკიდურესი გაუარესებით) გამოწვეული გამოუვალი მდგომარეობა, შეჯიბრი უნდა დასრულდეს ერთ დღეში. მონაწილეების რამდენიმე ჯგუფად დაყოფის შემთხვევაში, მათი განაწილება ორგანიზატორთა მიერ უნდა განხორციელდეს იმგვარად, რომ ერთი გამომყვანის ძაღლები მოხვდნენ ერთ ჯგუფში.

მუხლი 10

წყვილთა შეჯიბრი უნდა იმსაჯოს სულ ცოტა, ორმა კვალიფიციურმა, FCG-ს მიერ სერტიფიცირებულმა მსაჯმა. ინდივიდუალური შეჯიბრი შეუძლია იმსაჯოს ერთ კვალიფიციურ, FCG-ს მიერ სერტიფიცირებულ მსაჯსაც. მსაჯს არ აქვს საკუთარი ან მის მიერ დაგეშილი, მისი ოჯახის წევრების, მასთან მაცხოვრებელი ნებისმიერი პირის კუთვნილი ძაღლის შეფასების უფლება.

მუხლი 11

შეჯიბრის მიმდინარეობისას წესრიგს იცავს კომენდანტი, რომელსაც ნიშნავენ ორგანიზატორები. მონაწილეები და მაყურებლები უნდა დაემორჩილონ ორგანიზატორთა მიერ დადგენილ წესებს, არ იხმაურონ, არ იარონ მინდორში. აკრძალულია ძაღლების ვარჯიში ან ნადირობა იმ ადგილებში, სადაც შეჯიბრი უნდა ჩატარდეს. მონაწილეები, რომლებიც არ დაიცავენ წესრიგს და არ დაემორჩილებიან კომენდანტს, შესაძლოა მოიხსნან შეჯიბრიდან ან დისკვალიფიცირებულ იქნენ გარკვეული ვადით. შეჯიბრის მონაწილე ძაღლის მფლობელს, თუ მას არ გამოყავს ძაღლი, ეკრძალება მსაჯებთან ურთიერთობა და საკუთარი აზრის გამოთქმა.

მუხლი 12

სტიქიური მოვლენების (ამინდის უკიდურესი გაუარესების) შემთხვევაში, ორგანიზატორი უფლებას იტოვებს, არ ჩაატაროს დაგეგმილი შეჯიბრი.

დ. გამოცდის მიმდინარეობა

მუხლი 13

შეჯიბრში მონაწილეებმა ძაღლებითურთ, თავი უნდა მოიყარონ დათქმულ დროს შეკრების ადგილას. ხოლო შემდგომ, მუდმივ მზადყოფნაში უნდა იყვნენ მინდორში გამოძახებისთვის. დაგვიანების ან არგამოცხადების შემთხვევაში ძაღლი მოიხსნება შეჯიბრიდან.

მუხლი 14

მინდორში გამოსვლის დროს, ძაღლს არ უნდა ეკეთოს და გამომყვანმაც არ უნდა გამოიყენოს რაიმე საწვრთნელი ან ძალდასატანებელი ხელსაწყო-მოწყობილობა. აკრძალულია ულტრაბგერითი სასტვენის გამოყენება.

მუხლი 15

გამომყვანი ვალდებულია შეასრულოს მსაჯების ყოველი მითითება. წყვილთა კონკურსში გამომყვანებმა ერთმანეთთან ახლოს უნდა იარონ. გამომყვანმა წინდახედულება და სიფრთხილე უნდა გამოიჩინოს ხმოვანი ბრძანების ან სასტვენის გამოყენებისას, რათა ხელი არ შეუშალოს მეწყვილეს ძაღლის მართვაში. ნაბულით მუშაობის შემდგომ, გამომყვანმა თასმა უნდა ჩააბას ძაღლს და დაელოდოს მთავარი მსაჯის განკარგულებას.

მუხლი 16

წყვილის გამოცდისას მსაჯები ისე უნდა განლაგდნენ სავარგულში, რომ მუდმივად თვალი ადევნონ ორივე ძაღლს. ძაღლის მიერ სადისკვალიფიკაციო შეცდომის დაშვებისას, განაპირა მსაჯებმა დაუყოვნებლივ უნდა აცნობონ ამის შესახებ მთავარ მსაჯს, რომელიც გადაწყვეტს, შეწყვიტოს თუ არა მისი გამოცდა. ყოველი წყვილის გამოცდის შემდეგ, მსაჯები იკრიბებიან და თითოეული აბარებს ანგარიშს მთავარ მსაჯს, ორივე ძაღლის მუშაობებისა თუ დაშვებული შეცდომების შესახებ.

მუხლი 17

ყოველი გამოსვლისას, ძაღლს პირველი წუთის განმავლობაში ეძლევა შეღავათი. ამ დროს, დადებითი მუშაობა ეთვლება ჩვეულებრივ, ხოლო ნებისმიერი დაშვებული შეცდომა, თუნდაც სადისკვალიფიკაციო, ეპატიება. თუმცაღა, მსაჯებს შეუძლიათ გაითვალისწინონ ეს შეცდომა, ადგილების საბოლოოდ მიკუთვნებისას.

შენიშვნა: მთავარმა მსაჯმა ნიშანი უნდა მისცეს პირველი წუთის გასვლის დასაფიქსირებლად.

მუხლი 18

გამოსვლის განმავლობაში ადგილის შეცვლისას, დროის ათვლა ჩერდება ძაღლისთვის თასმის ჩაბმისთანავე, ხელმეორედ გაშვებამდე. პაუზის შემდეგ, ძაღლის თავიდან გაშვებისას, ისევე როგორც შემდგომი გამოძახებებისას, ფრინველის დაფრთხობა ან გამოტოვება ქარქვეშ, პირველ პარალელზე მარცხნივ და მარჯვნივ, შეცდომად არ ითვლება.

მუხლი 19

პირველი ტური შეძლებისდაგვარად კარგი ნიავის პირობებში უნდა ჩატარდეს. ამ ტურში გამოსვლის ხანგრძლივობა 15 წუთს უნდა შეადგენდეს, თუ მანამდე ძაღლი სადისკვალიფიკაციო შეცდომას არ დაუშვებს და მისი მუშაობა აკმაყოფილებს შეჯიბრის მოთხოვნებს. წყვილში შეჯიბრისას, პირველ ტურში, განკუთვნილი დროის გასვლამდე ძაღლის მოხსნის შემთხვევაში, მის მეტოქეს დარჩენილ დროს შეძლებისდაგვარად უნაზღაურებენ და აძლევენ გამოსვლის დამთავრების საშუალებას ყველა წყვილის გამოცდის შემდგომ, განმეორებითი გამოსვლების დაწყებამდე.

მუხლი 20

მსაჯები უფლებამოსილები არიან იმდენჯერ გამოიძახონ ნებისმიერი ძაღლი მინდორში და გამოცადონ იმ დროის განმავლობაში, როგორც საჭიროდ ჩათვლიან. მათ შეუძლიათ ასევე, შეაფასონ ძაღლი პირველ ტურში გამოსვლის მიხედვით. მსაჯების გადასაწყვეტია, თუ რამდენ ხანს გაგრძელდება განმეორებითი (მეორე ტურის) გამოსვლები. პირველ ტურში ბრწყინვალედ გამოსვლის შემთხვევაში, მაგრამ ფრინველის არშეხვედრისას, მსაჯებს შეუძლიათ ძაღლი ხელმეორედ გამოიძახონ (მეორე ტური). მეორე ტურში, პირველი მუშაობისთანავე მსაჯმა უნდა მისცეს გამოსვლის დასრულების ნიშანი.

მუხლი 21

გამოსვლისთვის განკუთვნილი დროის დამთავრების შესახებ ნიშნის მიცემის შემდეგ, მხედველობაში აღარ მიიღება არც მუშაობა ნაბულით და არც დაშვებული შეცდომები, გარდა დაუმორჩილებლობის შემთხვევისა, როდესაც გამომყვანი ძაღლს დროულად ვერ მოიხმობს თავისთან. თუმცა ეს ხელს არ უშლის მას, მაღალ დონეზე გამოსვლის შემთხვევაში, დაიმსახუროს „თანდაყოლილი თვისებების სერტიფიკატი“ (CQN).

მუხლი 22

მსაჯებმა ყველა ღონე უნდა იხმარონ, რომ ძაღლებს თანაბარ პირობებში მოუწიოთ მუშაობა. შეფასებისას მათ უნდა გაითვალისწინონ რთულ პირობებში მუშაობისას გამოჩენილი საზრიანობა და მოხერხება, ხოლო წარმოქმნილი საორჭოფო საკითხი გადაწყვიტონ ყოველთვის ძაღლის სასარგებლოდ.

მუხლი 23

ნაბულიდან ფრინველის ამოსვლისას, გასროლა აუცილებელია.

ე. შეფასება და ადგილების მიკუთვნება

მუხლი 24

ძაღლი ვერ მიიღებს დადებით შეფასებას, თუ ერთხელ მაინც ნაბულით არ დაამუშავებს შეჯიბრის დებულებით გათვალისწინებულ ფრინველს:

• ა) გაზაფხულისა და რანგით მასთან გათანაბრებულ ზაფხულის შეჯიბრზე ძაღლები იცდებიან მხოლოდ ველურ ფრინველზე.
• ბ) სანადირო შეჯიბრზე ძაღლს ეთვლება შეჯიბრის დებულებაში ნახსენებ ნებისმიერ სანადირო ობიექტზე მუშაობა.

მუხლი 25

ფრინველის დამუშავება შემდეგნაირად მიმდინარეობს — სუნის დაჭერისას, ძაღლი საჭიროებისამებრ უახლოვდება ნაყნოს ფრინველს, შემდეგ უკეთებს ნაბულს და ასევე საჭიროების შემთხვევაში, ბრძანებაზე, ეტანება. ამოფრენას და გასროლას მშვიდად, გაუნძრევლად უნდა შეხვდეს. მუშაობა დამთავრებულად ითვლება მაშინ, როდესაც გამომყვანი თასმას ჩააბამს ძაღლს. თუ ნაბულის შემდგომ ფრინველი არ ამოფრინდა, ეს დადებით მუშაობად ვერ ჩაითვლება (ცრუ ნაბული). ძაღლი უნდა მიეტანოს მხოლოდ გამომყვანის ბრძანებით და იმოძრაოს მის წინ. ამასთან, გაბედულად, შეყოვნებების გარეშე უნდა მიყვეს სუნს, ფრინველზე ცხვირმოუცილებლად. შეფერხებით მიტანება ან როდესაც გამომყვანი იძულებულია ძალა დაატანოს ძაღლს, ნაკლად ითვლება. ასევე არასასურველია ფრინველზე მიხტომა ღია ადგილას. დიდ მანძილზე მიტანება ნაკლად არ მიიჩნევა, თუ ის ენერგიულია და გაბედული.

მიტანების უნარის არმქონე ძაღლი იხსნება შეჯიბრიდან. მიტანებასთან საერთო არ აქვს ძაღლის მიერ, გამომყვანის მიახლოებამდე, ფრინველის დამოუკიდებლად მიყოლას, რათა ცხვირიდან არ წაუვიდეს ეს უკანასკნელი.

სანადირო შეჯიბრის დროს აუცილებელი მოთხოვნაა ჩამოგდებული ფრინველის მოტანა (აპორტირება). თუ გამოსვლის განმავლობაში ძაღლს არ მიეცა ფრინველის მოტანის შესაძლებლობა, მოგვიანებით უნდა შემოწმდეს გაციებული ფრინველის აპორტირებაზე მაინც.

მუხლი 26

ძაღლი ფასდება არა მხოლოდ ნაპოვნი ფრინველის (ნაბულების) რაოდენობით, არამედ პირველ ყოვლისა, მუშაობის ხარისხის მიხედვით. მსაჯებმა შეფასებისას განსაკუთრებული ყურადღება უნდა მიაქციონ ისეთ მახასიათებლებს, როგორიცაა: ჯიშისთვის დამახასიათებელი სვლა და სტილი, ჟინი და შედეგიანობა, ყნოსვის სიძლიერე და მისი გამოყენების მანერა, ძებნისას გამოვლენილი ინიციატივა და საზრიანობა, გაბედულება ფრინველთან მიახლოებისას და სიფრთხილე მიტანებისას, გამომყვანისადმი მორჩილება და გაწვრთნილობა.

მუხლი 27

ძებნის არე უნდა შეესაბამებოდეს ჯიშის თავისებურებებს, ასევე შეჯიბრის ტიპს, სავარგულის რელიეფსა და მცენარეულ საფარს. ძაღლმა მისთვის განკუთვნილი სავარგული უნდა დაძებნოს გააზრებით და თანამიმდევრულად. გამომყვანთან მუდმივ კონტაქტში მყოფმა, ამავდროულად უნდა გამოიჩინოს რაც შეიძლება მეტი ინიციატივა. ძაღლმა უნდა ეძებოს ჯიშისთვის დამახასიათებელი, ენერგიული სვლით, მაღალ ტემპში, რაც არ უნდა შეანელოს მუშაობის მთელი პერიოდის განმავლობაში.

მუხლი 28

წყვილთა კონკურსში, ნაბულზე მდგომი მეწყვილის დანახვისას, ძაღლი თავისით უნდა გაჩერდეს, ბრძანებითა თუ სასტვენით წამყვანის ყოველგვარი მითითების გარეშე (სეკუნდირება). ძაღლის გაჩერების მიზნით, წამყვანის ნებისმიერი სახის ჩარევა ისჯება ძაღლის მოხსნით. მხოლოდ სანადირო შეჯიბრზეა ნებადართული ფრთხილი მითითება სეკუნდირების საჭიროებისას.

მუხლი 29

რაიმე ქმედების ახსნისას, მსაჯებს შორის წარმოქმნილი სადავო საკითხი წყდება ყოველთვის ძაღლის სასარგებლოდ.

მუხლი 30

შეჯიბრის მონაწილემ შეიძლება მიიღოს შემდეგი შეფასებები:

• ა) ფრიადი, CACT-ს მიკუთვნებით.
• ბ) ფრიადი, RCACT-ს მიკუთვნებით.
• გ) ფრიადი (ფრ), ძლიერ კარგი (ძლ. კარ), კარგი (კარ), კვალიფიკაციის გარეშე (კვ. გარ), არადამაკმაყოფილებელი (არადამ), დისკვალიფიკაცია (დის).

საპრიზო ადგილებზე გადის ოთხი საუკეთესო მონაწილე. მონაწილეების ჯგუფებად დაყოფის შემთხვევაში, იგივე წესი მოქმედებს თითოეულ ჯგუფში. საპრიზო ადგილის დაკავება შეუძლია ძაღლს, რომელიც შეფასდება მინიმუმ „ძლიერ კარგით“.

მუხლი 31

შეფასებისას აუცილებლად უნდა შესრულდეს შემდეგი მოთხოვნები:

• ა) იმისთვის, რომ მიიღოს დადებითი შეფასება (ფრ, ძლ.კარ, კარ), ძაღლმა არ უნდა დაუშვას სადისკვალიფიკაციო შეცდომა.
• ბ) რომ დაიმსახუროს შეფასება „ფრიადი“ — ფრინველის ამოფრენისას, ძაღლი თავისით, ადგილზე უნდა დარჩეს ფეხმოუცვლელად.
• გ) გამომყვანის მიერ სასტვენის, ბრძანებების ან ჟესტიკულაციის გაუმართლებლად ხშირად გამოყენებისას, ძაღლი უკეთეს შემთხვევაში შეიძლება შეფასდეს „ძლიერ კარგით“.
• დ) ფრინველზე მიხტომით მიტანებისას ღია ადგილებში, ძაღლი უკეთეს შემთხვევაში შეიძლება შეფასდეს „ძლიერ კარგით“.
• ე) ძაღლის მიერ შეჯიბრის დებულებით გათვალისწინებული ფრინველის გაუმართლებლად გამოტოვების ან დაფრთხობის შემთხვევაში, იგი შეიძლება შეფასდეს მაქსიმუმ „ძლიერ კარგით“.

მუხლი 32

CQN („თანდაყოლილი თვისებების სერტიფიკატი“) ენიჭება იმ ძაღლს, რომელიც გამოავლენს მაღალ ბუნებრივ თვისებებს, შესანიშნავად იმუშავებს დათმობილი დროის განმავლობაში (რაც უნდა გრძელდებოდეს სულ ცოტა 10 წუთს), დაამუშავებს ფრინველს ნაბულით, მაგრამ გამოეთიშება კონკურსს არდამორჩილების გამო; ასევე სანადირო შეჯიბრზე — ნაბულიდან ჩამოგდებული ან გაციებული (ადრე მოკლული) ფრინველის არმოტანის შემთხვევაშიც.

შენიშვნა: CQN შეფასებად არ მიიჩნევა, არამედ გამოიყენება გამორჩეული საველე თვისებების მქონე ძაღლის აღნიშვნისთვის და მისი შემდგომი მომზადებისთვის წასახალისებლად.

მუხლი 33

რომ დაიმსახუროს ტიტული C.A.C.T., ძაღლმა უნდა აჩვენოს უმაღლესი კლასის უზადო მუშაობა, ყოველგვარი შეცდომის დაშვების გარეშე. ერთი შეჯიბრის ფარგლებში, სხვადასხვა ჯგუფში რამდენიმე C.A.C.T.-ს მინიჭების შემთხვევაში, დღის ბოლოს, ამ ტიტულის მფლობელებს შორის ტარდება კონკურსი-შედარება შეჯიბრის გამარჯვებულის გამოსავლენად. ამ შემთხვევაში ძაღლებს მხოლოდამხოლოდ ჯიშისთვის დამახასიათებელი სტილისა და ძებნის მიხედვით ადარებენ ერთმანეთს. ფრინველზე მუშაობა და დაშვებული შეცდომები მხედველობაში არ მიიღება. მონაწილე კონკურსს შეიძლება გამოეთიშოს მხოლოდ აშკარა არდამორჩილების შემთხვევაში. თითო წყვილის შედარება გრძელდება არანაკლებ 3 წუთი.

მუხლი 34

ძაღლი იღებს შეფასება „არადამაკმაყოფილებელს“ (და იხსნება შეჯიბრიდან) შემდეგ შემთხვევებში:

1. თუ მისი გამოსვლა ვერ აკმაყოფილებს ჯიშის მახასიათებლებს ან მოცემული სახეობის შეჯიბრის მოთხოვნებს სტილის, სვლის ან ძებნის მხრივ, პირველი სამი წუთის განმავლობაში.
2. თუ არ დაიწყებს მუშაობას პირველივე წუთების განმავლობაში.
3. განუწყვეტლად ყეფის შემთხვევაში.
4. გასროლის აშკარა შიშის გამო.

მუხლი 35

ძაღლი იხსნება შეჯიბრიდან შემდეგ შემთხვევებში (დისკვალიფიკაცია):

1. შორს წინ წასვლის ან კონტაქტის დაკარგვისას, გამომყვანის არდამორჩილების შემთხვევაში ანდაც უსისტემოდ ძებნისას.
2. თუ წყვილში შეჯიბრისას, აშკარად ხელს უშლის მეტოქეს კუდში დევნით ან ცრუ ნაბულებით.
3. თუ წყვილში შეჯიბრისას, თავისით არ ჩერდება ნაბულზე მდგომი მეტოქის დანახვისას (არ სეკუნდირებს).
4. თუ ერთხელ მაინც, ნაბულის გარეშე გამიზნულად ამოიყვანს ნაყნოს ფრინველს.
5. ორჯერ გაუმართლებლად, შეჯიბრის დებულებით გათვალისწინებული ფრინველის დაფრთხობის ან გამოტოვებისას.
6. სამჯერ სხვადასხვაგან, მყარი და თავდაჯერებული ცრუ ნაბულის გაკეთებისას.
7. ძებნის დროს ან ნაბულიდან ცხოველის ან ფრინველის გაკიდებისას, ბრძანებით შეჩერების თავდაპირველი მცდელობის მიუხედავად.

ამასგარდა, სანადირო შეჯიბრზე ფრინველის მოპოვებითურთ:

8. მსაჯების მიერ დანახული, ჩამოგდებული ფრინველის ვერპოვნისას, თუ პირს უჭერს, აფუჭებს ფრინველს.
9. თუ არ მოიტანს თავისივე ნაბულიდან ჩამოგდებულ ან გაციებულ (ადრე მოკლულ) ფრინველს. ამ შემთხვევაში იგულისხმება მხოლოდ დებულებით გათვალისწინებული სახეობის ფრინველი.

მუხლი 36

მსაჯები გადაწყვეტილებას იღებენ ხმათა უმრავლესობით. ხმების თანაბრად გაყოფის შემთხვევაში, მთავარი მსაჯის აზრს ენიჭება უპირატესობა. მსაჯების გადაწყვეტილება არ საჩივრდება.

მუხლი 37

შეჯიბრის დამთავრების შემდეგ, მთავარმა მსაჯმა უნდა გამოაცხადოს შედეგები კომენტარებითურთ. ამავე დღეს, მან ორგანიზატორებს უნდა წარუდგინოს შეფასებამიღებული ძაღლების ჩამონათვალი დაკავებული ადგილების მიხედვით.

მუხლი 38

წინამდებარე წესები შეადგენს FCG-ს მიერ დადგენილ მინიმალურ მოთხოვნათა კრებულს, საქართველოში ჩასატარებელი ეროვნული რანგის შეჯიბრებებისთვის. ცალკეული შეჯიბრის დებულება დამატებით შეიძლება მოიცავდეს მხოლოდ უფრო გამკაცრებულ მოთხოვნებს.